ଜଳବାୟୁ ପରିବର୍ତ୍ତନ ବା କ୍ଲାଇମେଟ୍ ଚେଞ୍ଜ୍ ଏବେ କେବଳ ପ୍ରକୃତି ଉପରେ ନୁହେଁ, ବରଂ ମଣିଷର ଦୈନନ୍ଦିନ ଜୀବନ ଓ ସ୍ୱାସ୍ଥ୍ୟ ଉପରେ ମଧ୍ୟ ସାଂଘାତିକ ପ୍ରଭାବ ପକାଇଲାଣି। ଏକ ସମ୍ପ୍ରତି ଗବେଷଣାରୁ ସାମ୍ନାକୁ ଆସିଛି ଏକ ଚମକାଇଲା ଭଳି ସତ୍ୟ। ବିଶ୍ୱ ତାପମାତ୍ରା ବୃଦ୍ଧି ଯୋଗୁଁ ଏବେ ଲୋକଙ୍କ ନିଦ ହଜିବାରେ ଲାଗିଛି ଏବଂ ଏଥିରେ ସବୁଠୁ ଅଧିକ ପ୍ରଭାବିତ ହେଉଛନ୍ତି ବଡ଼ ବଡ଼ ସହରର ବାସିନ୍ଦା।
ରିପୋର୍ଟ ଅନୁସାରେ, ଗ୍ଲୋବାଲ ୱାର୍ମିଂ କାରଣରୁ ଦିନ ଅପେକ୍ଷା ରାତିର ତାପମାତ୍ରା ଦ୍ରୁତ ଗତିରେ ବଢ଼ିବାରେ ଲାଗିଛି। ସହରଗୁଡ଼ିକରେ କଂକ୍ରିଟ୍ ଜଙ୍ଗଲ, ଗାଡ଼ି ମୋଟରରୁ ନିର୍ଗତ ଧୂଆଁ ଓ ଏସିର ବ୍ୟବହାର ଯୋଗୁଁ ‘ଅର୍ବାନ ହିଟ୍ ଆଇଲ୍ୟାଣ୍ଡ’ ସୃଷ୍ଟି ହେଉଛି, ଯାହା ରାତିର ପରିବେଶକୁ ଅଧିକ ଗରମ ଓ ଗୁଳୁଗୁଳି ଗ୍ରସ୍ତ କରୁଛି। ଫଳରେ ମଣିଷ ଶରୀର ଶୋଇବା ପାଇଁ ଆବଶ୍ୟକ କରୁଥିବା ସ୍ୱାଭାବିକ ତାପମାତ୍ରା ପାଇପାରୁ ନାହିଁ।
ବିଶେଷଜ୍ଞଙ୍କ କହିବା ଅନୁସାରେ, ଅତ୍ୟଧିକ ଗରମ ଯୋଗୁଁ ଲୋକେ ବିଳମ୍ବରେ ଶୋଉଛନ୍ତି ଏବଂ ଶୀଘ୍ର ଉଠିପଡୁଛନ୍ତି। ଏହି ଅନିଦ୍ରା ସମସ୍ୟା (Insomnia) କାରଣରୁ ମାନସିକ ଚାପ, ହୃଦରୋଗ ଏବଂ ରକ୍ତଚାପ ଭଳି ସମସ୍ୟା ବଢ଼ିବାରେ ଲାଗିଛି। ଯଦି ଜଳବାୟୁ ପରିବର୍ତ୍ତନକୁ ରୋକା ନଯାଏ, ତେବେ ଆଗାମୀ ଦିନରେ ଏହି ସଙ୍କଟ ଆହୁରି ଭୟଙ୍କର ରୂପ ନେବ ବୋଲି ଚେତାବନୀ ଦିଆଯାଇଛି।
