ବର୍ଷାର ଆଗମନ ସହ ବଦଳୁଥିବା ପାଗ ଯୋଗୁଁ ଘରେ ଘରେ ଥଣ୍ଡା, କାଶ, ଗଳା ବିନ୍ଧା ଓ ଜ୍ୱର ଭଳି ସମସ୍ୟା ଦେଖାଦିଏ। ଏହି ସମୟରେ ଲୋକେ ଆରାମ ପାଇଁ ଅଦା ଚା’ କିମ୍ବା କାଢ଼ା ପିଇବାକୁ ପସନ୍ଦ କରନ୍ତି। କିନ୍ତୁ ପ୍ରଶ୍ନ ଉଠେ, ଏହି ଦୁଇଟି ମଧ୍ୟରୁ କେଉଁଟି ଅଧିକ ଉପକାରୀ? ଡାକ୍ତର ଓ ଆୟୁର୍ବେଦ କ’ଣ କହନ୍ତି?
ଅଦା ଚା’ (Ginger Tea): ଅଦାରେ ଥିବା ଜିଞ୍ଜରୋଲ୍ (Gingerol) ଓ ଆଣ୍ଟି-ଅକ୍ସିଡାଣ୍ଟ ଗଳା ବିନ୍ଧା, ସଂକ୍ରମଣ ଓ କାଶରୁ ତୁରନ୍ତ ସାନ୍ତ୍ୱନା ଦିଏ। ଏହା ଶରୀରକୁ ଉଷୁମ ରଖିବା ସହ ପାଚନ ପ୍ରକ୍ରିୟାକୁ ସୁଗମ କରେ। ତେବେ ଚା’ରେ ଦୁଗ୍ଧ ଓ ଚିନିର ମାତ୍ରା ଅଧିକ ଥିଲେ, ଏହା କଫ ବୃଦ୍ଧି କରିପାରେ।
କାଢ଼ା (Kadha): ଆୟୁର୍ବେଦ ଅନୁସାରେ କାଢ଼ା ହେଉଛି ଏକ ଶକ୍ତିଶାଳୀ ଔଷଧ। ଅଦା, ତୁଳସୀ, ଗୋଲମରିଚ, ଲବଙ୍ଗ, ଡାଲଚିନି ଓ ଯୋଆଣି ଭଳି ଜଡ଼ିବୁଟିକୁ ସିଝାଇ ତିଆରି ହେଉଥିବା ଏହି ପାନୀୟ ଶରୀରର ରୋଗପ୍ରତିରୋଧକ ଶକ୍ତି (Immunity) ବୃଦ୍ଧି କରେ। ଏହା ଛାତିରୁ କଫ ବାହାର କରିବାରେ ଏବଂ ଭୂତାଣୁ ଜନିତ ସଂକ୍ରମଣକୁ ରୋକିବାରେ ବିଶେଷ ସାହାଯ୍ୟ କରେ।
କେଉଁଟି ସବୁଠୁ ଶ୍ରେଷ୍ଠ? ଯଦି ଆପଣଙ୍କୁ ହାଲୁକା ଗଳା ଖସଖସ କିମ୍ବା ଆରାମ ଦରକାର, ତେବେ ବିନା କ୍ଷୀର-ଚିନିର ଅଦା-ଲେମ୍ବୁ-ମହୁ ଚା’ ଉତ୍ତମ। କିନ୍ତୁ ଜବରଦସ୍ତ ଥଣ୍ଡା, ଜ୍ୱର ଓ କାଶ ସମୟରେ ଆୟୁର୍ବେଦିକ କାଢ଼ା ସବୁଠାରୁ ଅଧିକ ପ୍ରଭାବଶାଳୀ।
ମନେରଖନ୍ତୁ: କାଢ଼ା ଅତ୍ୟଧିକ ପିଇଲେ ପେଟ ଜଳାପୋଡ଼ା ହୋଇପାରେ, ତେଣୁ ଦିନକୁ ଥରେ କିମ୍ବା ଦୁଇଥର ଅଳ୍ପ ପରିମାଣରେ ପିଇବା ସ୍ୱାସ୍ଥ୍ୟ ପାଇଁ ହିତକର।
