ସାଧାରଣତଃ ଗରମ ଦିନରେ କିମ୍ବା ଅଧିକ ପରିଶ୍ରମ କଲେ ଶୋଷ ଲାଗିବା ଏକ ସ୍ୱାଭାବିକ ପ୍ରକ୍ରିୟା। କିନ୍ତୁ ଯଦି ଆପଣ ବାରମ୍ବାର ପାଣି ପିଇବା ପରେ ମଧ୍ୟ ପାଟି ଶୁଖିଯାଉଛି ବା ପ୍ରବଳ ଶୋଷ ଅନୁଭବ ହେଉଛି, ତେବେ ଏହାକୁ ହେୟଜ୍ଞାନ କରନ୍ତୁ ନାହିଁ। ଚିକିତ୍ସା ବିଜ୍ଞାନ ଭାଷାରେ ଏହାକୁ ‘ପଲିଡିପସିଆ’ (Polydipsia) କୁହାଯାଏ, ଯାହା ଶରୀରରେ ଘଟୁଥିବା କିଛି ବଡ଼ ପରିବର୍ତ୍ତନ କିମ୍ବା ରୋଗର ପୂର୍ବ ସୂଚନା ହୋଇପାରେ।
ବାରମ୍ବାର ପାଟି ଶୁଖିବା ପଛରେ ଅନେକ କାରଣ ଥାଇପାରେ:
୧. ମଧୁମେହ ବା ଡାଇବେଟିସ୍: ଅତ୍ୟଧିକ ଶୋଷ ଲାଗିବା ମଧୁମେହର ସବୁଠାରୁ ବଡ଼ ଲକ୍ଷଣ। ଯେତେବେଳେ ରକ୍ତରେ ଶର୍କରା ବା ସୁଗାରର ମାତ୍ରା ବଢିଯାଏ, କିଡନୀ ଏହାକୁ ବାହାର କରିବା ପାଇଁ ଅଧିକ ପରିସ୍ରା ତିଆରି କରେ। ଫଳରେ ଶରୀରରୁ ଜଳୀୟ ଅଂଶ କମିଯାଏ ଏବଂ ବାରମ୍ବାର ଶୋଷ ଲାଗେ।
୨. ଡିହାଇଡ୍ରେସନ୍ (ଜଳାଭାବ): ଯଦି ଆପଣ ଦିନସାରା ପର୍ଯ୍ୟାପ୍ତ ପରିମାଣର ପାଣି ପିଉନାହାଁନ୍ତି କିମ୍ବା ଝାଳ ବେଶୀ ବୋହୁଛି, ତେବେ ଶରୀରରେ ଜଳୀୟ ଅଂଶର ଅଭାବ ଦେଖାଦିଏ। ଏହା ଦ୍ୱାରା କେବଳ ପାଟି ଶୁଖେ ନାହିଁ, ବରଂ ମୁଣ୍ଡ ବୁଲାଇବା ଏବଂ କ୍ଲାନ୍ତି ମଧ୍ୟ ଅନୁଭବ ହୁଏ।
୩. ମୁଖ ଗହ୍ୱର ସମସ୍ୟା (Dry Mouth): ଅନେକ ସମୟରେ ଲାଳ ଗ୍ରନ୍ଥିରୁ ଠିକ୍ ଭାବେ ଲାଳ ନିର୍ଗତ ନହେବା ଫଳରେ ପାଟି ଶୁଖିଲା ରହେ। ଏହାକୁ ‘ଜେରୋଷ୍ଟୋମିଆ’ କୁହାଯାଏ। ଧୂମ୍ରପାନ କିମ୍ବା କିଛି ନିର୍ଦ୍ଦିଷ୍ଟ ଔଷଧ ସେବନ ଯୋଗୁଁ ମଧ୍ୟ ଏପରି ହୋଇପାରେ।
୪. ଆନିମିଆ ବା ରକ୍ତହୀନତା: ଶରୀରରେ ଲୋହିତ ରକ୍ତ କଣିକାର ଅଭାବ ହେଲେ ମଧ୍ୟ ଅଧିକ ଶୋଷ ଲାଗିବା ଭଳି ସମସ୍ୟା ଦେଖାଦିଏ। ଏହା ସହିତ ଦୁର୍ବଳତା ମଧ୍ୟ ଅନୁଭବ ହୋଇଥାଏ।
ଯଦି ଆପଣଙ୍କୁ ଦୀର୍ଘ ଦିନ ଧରି ଏହି ସମସ୍ୟା ରହୁଛି, ତେବେ ତୁରନ୍ତ ଡାକ୍ତରଙ୍କ ପରାମର୍ଶ ନେଇ ବ୍ଲଡ୍ ସୁଗାର୍ ଟେଷ୍ଟ କରାନ୍ତୁ। ଦିନକୁ ଅତି କମରେ ୩ ରୁ ୪ ଲିଟର ପାଣି ପିଅନ୍ତୁ ଏବଂ ନିଜ ଖାଦ୍ୟରେ ଫଳ ରସ ଓ ପନିପରିବା ସାମିଲ କରନ୍ତୁ। ମନେରଖନ୍ତୁ, ସ୍ୱାସ୍ଥ୍ୟ ପ୍ରତି ସଚେତନତା ହିଁ ସୁସ୍ଥ ଜୀବନର ଚାବିକାଠି।
