ସକାଳ ସମୟରେ ସମସ୍ତଙ୍କ ପାଖରେ ସମୟର ଅଭାବ ଥାଏ। ଏଭଳି ପରିସ୍ଥିତିରେ ଘରର ଗୃହିଣୀ ହୁଅନ୍ତୁ ବା ବ୍ୟାଚେଲର୍ସ, ସମସ୍ତଙ୍କ ପାଇଁ ଝଟପଟ୍ ଜଳଖିଆ ପ୍ରସ୍ତୁତ କରିବା ଏକ ବଡ଼ ଚ୍ୟାଲେଞ୍ଜ ହୋଇଥାଏ। ଯଦି ଆପଣ ମଧ୍ୟ କମ୍ ସମୟ ମଧ୍ୟରେ କିଛି ସ୍ୱାଦିଷ୍ଟ ଏବଂ ସ୍ୱାସ୍ଥ୍ୟକର ଜଳଖିଆ ଖୋଜୁଛନ୍ତି, ତେବେ ‘ସୁଜି ଉତ୍ତପମ’ ହେଉଛି ସବୁଠାରୁ ବେଷ୍ଟ ଅପ୍ସନ। ମାତ୍ର ୧୦ ମିନିଟରେ ଏହା ପ୍ରସ୍ତୁତ ହୋଇଯାଏ ଏବଂ ଏଥିପାଇଁ ପୂର୍ବରୁ କୌଣସି ବ୍ୟାଟର ପ୍ରସ୍ତୁତ କରିବାକୁ ପଡ଼ିନଥାଏ।
ଆବଶ୍ୟକ ସାମଗ୍ରୀ:
- ସୁଜି (Rava) – ୧ କପ୍
- ଦହି – ଅଧା କପ୍
- କଟା ପିଆଜ, ଟମାଟୋ, କଞ୍ଚା ଲଙ୍କା, କାପ୍ସିକମ୍ ଓ ଗାଜର
- ଧନିଆ ପତ୍ର ଓ ସ୍ୱାଦ ଅନୁସାରେ ଲୁଣ
ପ୍ରସ୍ତୁତି ପ୍ରଣାଳୀ: ପ୍ରଥମେ ଏକ ପାତ୍ରରେ ସୁଜି, ଦହି, ସାମାନ୍ୟ ପାଣି ଏବଂ ଲୁଣ ମିଶାଇ ଏକ ଘନ ମିଶ୍ରଣ (Batter) ପ୍ରସ୍ତୁତ କରନ୍ତୁ। ଏହାକୁ ୫ ମିନିଟ୍ ପାଇଁ ଘୋଡ଼ାଇ ରଖିଦିଅନ୍ତୁ। ଏହାପରେ ଏକ ନନ୍-ଷ୍ଟିକ୍ ତାୱା ଗରମ କରି ସେଥିରେ ଅଳ୍ପ ତେଲ ବା ଘିଅ ଲଗାନ୍ତୁ। ଏବେ ପ୍ରସ୍ତୁତ ବ୍ୟାଟରକୁ ତାୱାରେ ଢାଳି ସାମାନ୍ୟ ମୋଟା କରି ପେଲାନ୍ତୁ। ଏହାର ଉପରେ କଟା ପରିବାଗୁଡ଼ିକୁ ପକାଇ ହାଲୁକା ଭାବେ ଚାପି ଦିଅନ୍ତୁ। ଏହାକୁ ଦୁଇ ପାଖରୁ ଭଲ ଭାବେ ସେକି ନେଲେ ପ୍ରସ୍ତୁତ ହୋଇଯିବ ଗରମ ଗରମ ସୁଜି ଉତ୍ତପମ।
ଏହାକୁ ଆପଣ ନଡ଼ିଆ ଚଟଣି କିମ୍ବା ଟମାଟୋ ସସ ସହ ଗରମ ଗରମ ପରଷି ପାରିବେ। ଏହା କେବଳ ସ୍ୱାଦିଷ୍ଟ ନୁହେଁ, ବରଂ ଶରୀର ପାଇଁ ବେଶ୍ ହେଲଦି ମଧ୍ୟ।
