ପଞ୍ଚାୟତ ନିର୍ବାଚନ ପୂର୍ବରୁ କର୍ମୀଙ୍କ ମନରେ ପ୍ରଶ୍ନ: କେବେ ଭାଙ୍ଗିବ ଏହି ନୀରବତା? 201

ରାଜ୍ୟରେ ଆଗକୁ ଆସୁଛି ପଞ୍ଚାୟତ ନିର୍ବାଚନ। ଆଉ ଏହାକୁ ନେଇ ଏବେ ରାଜନୈତିକ କରିଡରରେ ଗୋଟିଏ ବଡ଼ ପ୍ରଶ୍ନ ଘୂରି ବୁଲୁଛି—କେବେ ଜିଲ୍ଲା ଗସ୍ତରେ ବାହାରିବେ ବିଜେଡି ସୁପ୍ରିମୋ ନବୀନ ପଟ୍ଟନାୟକ?ଦଳୀୟ ପରାଜୟକୁ ପ୍ରାୟ ଦୁଇ ବର୍ଷ ବିତିଗଲାଣି। ବିଭିନ୍ନ ଜିଲ୍ଲାରୁ ନେତା ଓ କର୍ମୀମାନେ ଦଳ ସଭାପତିଙ୍କୁ ସିଧାସଳଖ ଜିଲ୍ଲାକୁ ଆସିବାକୁ ଏବଂ କର୍ମୀଙ୍କ ସହ ଆଲୋଚନା କରି ସଂଗଠନକୁ ନୂଆ ଉତ୍ସାହ ଦେବାକୁ ବାରମ୍ବାର ଅନୁରୋଧ କରୁଛନ୍ତି। କିନ୍ତୁ ବାସ୍ତବତା କିଛି ଅଲଗା।ବର୍ତ୍ତମାନ ସବୁକିଛି ବୈଠକ ଏବଂ ଆଲୋଚନା କେବଳ ‘ନବୀନ ନିବାସ’ର ଚାରି କାନ୍ଥ ଭିତରେ ସୀମିତ ରହିଛି। ଫଳରେ ତୃଣମୂଳ ସ୍ତରର କର୍ମୀଙ୍କ ସହ ସିଧାସଳଖ ସମ୍ପର୍କ କମିଯାଉଥିବା ନେଇ ଦଳ ଭିତରେ ବି ଚର୍ଚ୍ଚା ଜୋର ଧରିଛି।ରାଜନୈତିକ ବିଶ୍ଳେଷକଙ୍କ ମତରେ, କେବଳ ରାଜଧାନୀରେ ବୈଠକ କରି ଶାସକ ଦଳକୁ କଡ଼ା ଟକ୍କର ଦେବା ସମ୍ଭବ ନୁହେଁ। ଯଦି ପଞ୍ଚାୟତ ନିର୍ବାଚନରେ ବାଜି ମାରିବାର ଅଛି, ତେବେ ଜିଲ୍ଲା ଓ ପଞ୍ଚାୟତ ସ୍ତରରେ ସଂଗଠନକୁ ସକ୍ରିୟ କରି କର୍ମୀଙ୍କ ମନୋବଳ ବଢ଼ାଇବାକୁ ପଡ଼ିବ।ତେବେ ପ୍ରଶ୍ନ ହେଉଛି—ନବୀନ ପଟ୍ଟନାୟକ କେବେ ଜିଲ୍ଲା ଗସ୍ତ ଆରମ୍ଭ କରିବେ? କେବେ ପୁଣିଥାଏ ରାଜ୍ୟର କୋଣେ କୋଣେ ଶୁଭିବ ତାଙ୍କ ଗସ୍ତର ସୂଚନା? ଆଗାମୀ ପଞ୍ଚାୟତ ନିର୍ବାଚନ ପାଇଁ ପ୍ରକୃତରେ ବିଜେଡିର ରଣନୀତି କଣ ରହିବ? ଏସବୁର ଉତ୍ତର ଉପରେ ଏବେ ସମସ୍ତଙ୍କ ନଜର।ଏହି ପ୍ରଶ୍ନର ଉତ୍ତର ଆଗାମୀ ଦିନରେ ରାଜନୈତିକ ସମୀକରଣକୁ କିଭଳି ବଦଳାଇବ, ତାହା ଦେଖିବାକୁ ବାକି ରହିଲା। ଆପଣଙ୍କ ମତରେ ନବୀନ ବାବୁଙ୍କର ଜିଲ୍ଲା ଗସ୍ତ ନିର୍ବାଚନରେ କେତେ ପ୍ରଭାବ ପକାଇବ? କମେଣ୍ଟ କରି ଜଣାନ୍ତୁ।