ବର୍ତ୍ତମାନର ବ୍ୟସ୍ତବହୁଳ ଜୀବନଶୈଳୀ ଏବଂ ମାନସିକ ଚାପ ଯୋଗୁଁ କମ୍ ବୟସରୁ ମଧ୍ୟ ଅନେକଙ୍କର ସ୍ମୃତି ଶକ୍ତି ହ୍ରାସ ପାଉଥିବା ଦେଖାଯାଉଛି। ବୟସ ବଢ଼ିବା ସହିତ ଜିନିଷ ଭୁଲିଯିବା ଏକ ସାଧାରଣ ସମସ୍ୟା। କିନ୍ତୁ ଆପଣ ଜାଣନ୍ତି କି, ଆମର ଦୈନନ୍ଦିନ ଖାଦ୍ୟପେୟ ଆମ ମସ୍ତିଷ୍କର କାର୍ଯ୍ୟକ୍ଷମତା ଉପରେ ସିଧାସଳଖ ପ୍ରଭାବ ପକାଇଥାଏ? ଯଦି ଆପଣ ନିଜର ମେମୋରୀ ପାୱାର୍ ବା ସ୍ମୃତି ଶକ୍ତି ବଢ଼ାଇବାକୁ ଚାହୁଁଛନ୍ତି, ତେବେ ନିଜ ଡାଏଟରେ ଆଜି ହିଁ ଏହି ୬ଟି ସୁପରଫୁଡ୍ ସାମିଲ କରନ୍ତୁ:
୧. ଆଖରୋଟ (Walnuts): ମସ୍ତିଷ୍କର ଆକାର ଭଳି ଦେଖାଯାଉଥିବା ଆଖରୋଟରେ ଭରପୂର ମାତ୍ରାରେ ଓମେଗା-୩ ଫ୍ୟାଟି ଏସିଡ୍ ଥାଏ, ଯାହା ମସ୍ତିଷ୍କକୁ ସୁସ୍ଥ ରଖିବାରେ ପ୍ରମୁଖ ଭୂମିକା ଗ୍ରହଣ କରେ।
୨. ସବୁଜ ପନିପରିବା (Green Vegetables): ପାଳଙ୍ଗ ଓ ବ୍ରୋକୋଲି ଭଳି ପରିବାରେ ଭିଟାମିନ୍ ‘କେ’ (Vitamin K), ଫୋଲେଟ୍ ଏବଂ ବିଟା କ୍ୟାରୋଟିନ୍ ଥାଏ, ଯାହା ସ୍ମରଣ ଶକ୍ତି ବୃଦ୍ଧି କରିବାରେ ବେଶ୍ ସହାୟକ।
୩. ବେରୀ ଫଳ (Berries): ବ୍ଲୁ-ବେରୀ ଏବଂ ଷ୍ଟ୍ରବେରୀରେ ଥିବା ଆଣ୍ଟି-ଅକ୍ସିଡାଣ୍ଟ ମସ୍ତିଷ୍କର କୋଷିକାଗୁଡ଼ିକୁ କ୍ଷୟ ହେବାରୁ ରକ୍ଷା କରେ ଏବଂ ଯୋଗାଯୋଗ ବୃଦ୍ଧି କରେ।
୪. ଡାର୍କ ଚକୋଲେଟ୍ (Dark Chocolate): ଏହା ମସ୍ତିଷ୍କକୁ ରକ୍ତ ସଞ୍ଚାଳନ ବୃଦ୍ଧି କରିବା ସହ ବାର୍ଦ୍ଧକ୍ୟ ପ୍ରଭାବରୁ ମସ୍ତିଷ୍କକୁ ରକ୍ଷା କରେ ଏବଂ ସ୍ମୃତି ଶକ୍ତି ପ୍ରଖର କରେ।
୫. କଖାରୁ ମଞ୍ଜି (Pumpkin Seeds): ଏଥିରେ ଜିଙ୍କ୍, ଆଇରନ୍ ଏବଂ ମ୍ୟାଗ୍ନେସିୟମ୍ ଭରପୂର ମାତ୍ରାରେ ଥାଏ, ଯାହା ଚିନ୍ତା (Stress) ଦୂର କରି ସ୍ନାୟୁ ପ୍ରଣାଳୀକୁ ସୁଦୃଢ଼ କରେ।
୬. ଫ୍ୟାଟି ଫିସ୍ ବା ମାଛ (Fatty Fish): ମାଛରେ ଥିବା ଓମେଗା-୩ ମସ୍ତିଷ୍କର ନୂତନ କୋଷିକା ଗଠନରେ ସାହାଯ୍ୟ କରେ।
କେବଳ ଶାରୀରିକ ସୁସ୍ଥତା ନୁହେଁ, ବରଂ ମାନସିକ ସୁସ୍ଥତା ପାଇଁ ମଧ୍ୟ ଉପଯୁକ୍ତ ପୋଷଣ ନିହାତି ଜରୁରୀ। ତେଣୁ ଏହି ସୁପରଫୁଡ୍ ଗୁଡ଼ିକୁ ନିଜର ଦୈନନ୍ଦିନ ଖାଦ୍ୟରେ ସାମିଲ କରନ୍ତୁ ଏବଂ ପର୍ଯ୍ୟାପ୍ତ ନିଦ ସହ ମସ୍ତିଷ୍କକୁ ସୁସ୍ଥ ରଖନ୍ତୁ।
