ରାଜ୍ୟରେ ପୁଣି ସାମ୍ନାକୁ ଆସିଛି ସ୍ୱାସ୍ଥ୍ୟ ସେବାର ଚରମ ଅବହେଳାର ଏକ ଦୁଃଖଦ ଚିତ୍ର। ଆମ୍ବୁଲାନ୍ସରୁ ତେଲ ସରିଯିବା କାରଣରୁ ମଝି ରାସ୍ତାରେ ଜଣେ ରୋଗୀଙ୍କ ଜୀବନ ଚାଲିଯାଇଛି। ତେଲ ସଙ୍କଟ ମଧ୍ୟରେ କଟକ ସହରରୁ ଆସିଥିବା ଏହି ଖବର ସାରା ରାଜ୍ୟକୁ ଆନ୍ଦୋଳିତ କରିଦେଇଛି।
ସୂଚନା ଅନୁସାରେ, କେନ୍ଦ୍ରାପଡ଼ା ଅଞ୍ଚଳର ଜଣେ ଗୁରୁତର ରୋଗୀ କଟକ ବଡ଼ ମେଡିକାଲ (SCB)ରେ ଚିକିତ୍ସିତ ହେଉଥିଲେ। ପରେ ତାଙ୍କୁ ଏକ ଘରୋଇ ହସ୍ପିଟାଲକୁ ସ୍ଥାନାନ୍ତର କରାଯାଉଥିଲା। ମାତ୍ର ଦୁର୍ଭାଗ୍ୟବଶତଃ, ରାସ୍ତା ମଝିରେ ହଠାତ୍ ଆମ୍ବୁଲାନ୍ସରୁ ତେଲ ସରିଯାଇଥିଲା। ଗାଡ଼ିଟି ଅଟକି ରହିବାରୁ ସମୟ ମତେ ଚିକିତ୍ସା ନମିଳିବାରୁ ରୋଗୀ ଜଣକ ଛଟପଟ ହୋଇ ଆଖି ବୁଜିଥିଲେ।
ଏହି ଘଟଣା ଏବେ ଅନେକ ଗମ୍ଭୀର ପ୍ରଶ୍ନ ସୃଷ୍ଟି କରିଛି। ଯେତେବେଳେ ଜଣେ ଜୀବନ-ମରଣ ସହ ସଂଗ୍ରାମ କରୁଥିବା ରୋଗୀଙ୍କୁ ନିଆଯାଉଥିଲା, ସେତେବେଳେ ଆମ୍ବୁଲାନ୍ସର ତେଲ କିପରି ଯାଞ୍ଚ କରାଯାଇନଥିଲା? ଏହି ଦାୟିତ୍ୱହୀନତା ପାଇଁ ପ୍ରକୃତରେ ଦାୟୀ କିଏ? ଆମ୍ବୁଲାନ୍ସ ଚାଳକ, ମାଲିକ ନା ବ୍ୟବସ୍ଥା? ଗୋଟିଏ ପଟେ ରାଜ୍ୟରେ ଚାଲିଥିବା ତେଲ ସଙ୍କଟ ଏବଂ ଅନ୍ୟପଟେ ଏଭଳି ସାଙ୍ଘାତିକ ଅବହେଳା ଆଜି ଜଣେ ନିରୀହ ଲୋକର ଜୀବନ ନେଇଯାଇଛି। ମୃତକଙ୍କ ପରିବାର ଲୋକେ ଏବେ ନ୍ୟାୟ ଦାବି କରିଥିବା ବେଳେ, ଏହି ଘଟଣାକୁ ନେଇ ସ୍ଥାନୀୟ ଅଞ୍ଚଳରେ ତୀବ୍ର ଅସନ୍ତୋଷ ପ୍ରକାଶ ପାଇଛି।
