ବର୍ଷା ଦିନିଆ ଆକାଶ, ଆଉ ସାଙ୍ଗକୁ ଟପ୍ ଟପ୍ ଟୋପା ବର୍ଷା… ଏମିତି ପାଗରେ ମନ ଖୋଜେ କିଛି ଗରମ ଆଉ ଚଟପଟା! ଯଦି ଆପଣ ବି ଏହି ସନ୍ଧ୍ୟାରେ କିଛି ହାଲୁକା ତଥା ସ୍ୱାଦିଷ୍ଟ ପିଇବାକୁ ଚାହୁଁଛନ୍ତି, ତେବେ ଗରମ ଗରମ ସୁପ୍ ହେଉଛି ସବୁଠୁ ଉତ୍ତମ ବିକଳ୍ପ। ଏହା କେବଳ ପାଟିକୁ ସ୍ୱାଦିଷ୍ଟ ଲାଗେନାହିଁ, ବରଂ ଶରୀରକୁ ଭିତରୁ ଉଷୁମ ରଖିବା ସହ ଇମ୍ୟୁନିଟି (Immunity) ବଢ଼ାଇବାରେ ସାହାଯ୍ୟ କରିଥାଏ।
ଏହି ସୁପ୍ ବନାଇବା ପାଇଁ ଆପଣଙ୍କୁ ବେଶି ସମୟ କି ନାକେଦମ୍ ହେବାକୁ ପଡ଼ିବନାହିଁ। ମାତ୍ର ୧୫ ମିନିଟ୍ରେ ଘରେ ଥିବା ସାଧାରଣ ସାମଗ୍ରୀରେ ଏହା ପ୍ରସ୍ତୁତ ହୋଇପାରିବ।
ପ୍ରସ୍ତୁତି ପ୍ରଣାଳୀ: ପ୍ରଥମେ ଗୋଟିଏ କଡ଼େଇରେ ସାମାନ୍ୟ ବଟର କିମ୍ବା ତେଲ ଗରମ କରି ସେଥିରେ କଟା ରସୁଣ, ଅଦା ଓ କଞ୍ଚା ଲଙ୍କା ପକାଇ ଟିକେ ଭାଜି ଦିଅନ୍ତୁ। ଏହାପରେ ଆପଣଙ୍କ ପସନ୍ଦର ପରିବା ଯେପରିକି ଗାଜର, ବିନ୍ସ, କୋବି ଓ ମକା (Sweet Corn) ପକାଇ ହାଲୁକା ସତେଜ କରି ନିଅନ୍ତୁ। ଏବେ ସେଥିରେ ଆବଶ୍ୟକ ଅନୁସାରେ ପାଣି, ସ୍ୱାଦାନୁସାରେ ଲୁଣ ଓ ଗୋଲମରିଚ ଗୁଣ୍ଡ ମିଶାଇ ୫ ରୁ ୭ ମିନିଟ୍ ଫୁଟିବାକୁ ଦିଅନ୍ତୁ।
ସୁପ୍କୁ ବହଳିଆ କରିବା ପାଇଁ ଟିକିଏ କୋର୍ନଫ୍ଲୋର (Cornflour) ପାଣିରେ ଗୋଳାଇ ସେଥିରେ ମିଶାନ୍ତୁ। ଶେଷରେ ଉପରେ କଟା ଧନିଆ ପତ୍ର ଓ ସାମାନ୍ୟ ଲେମ୍ବୁ ରସ ପକାଇ ଗରମ ଗରମ ପରିବେଷଣ କରନ୍ତୁ।
ବର୍ଷା ଦିନେ ସର୍ଦ୍ଦି-କାଶରୁ ଦୂରେଇ ରହିବା ସହ ସ୍ୱାସ୍ଥ୍ୟକର ରହିବା ପାଇଁ ଆଜି ହିଁ ନିଜ ଘରେ ବନାନ୍ତୁ ଏହି ସହଜ ଓ ସ୍ୱାଦିଷ୍ଟ ସୁପ୍!
