ସାଧାରଣତଃ କଠିନ ପରିଶ୍ରମ କଲେ କିମ୍ବା ପ୍ରବଳ ଗରମ ହେଲେ ଶରୀରରୁ ଝାଳ ବାହାରିବା ଏକ ସ୍ବାଭାବିକ ପ୍ରକ୍ରିୟା। ମାତ୍ର ଅନେକ ସମୟରେ ଦେଖାଯାଏ ଯେ, ଏସି କିମ୍ବା ପଙ୍ଖା ତଳେ ବସିଥିଲେ ମଧ୍ୟ କିଛି ଲୋକଙ୍କ ଶରୀରରୁ ଅତ୍ୟଧିକ ଝାଳ ବାହାରିଥାଏ। ଯଦି ଆପଣଙ୍କ କ୍ଷେତ୍ରରେ ଏମିତି ଘଟୁଛି, ତେବେ ଏହାକୁ ହାଲୁକା ଭାବେ ନେବା ଉଚିତ୍ ନୁହେଁ। ଚିକିତ୍ସା ବିଜ୍ଞାନ ଭାଷାରେ ଏହି ଅବସ୍ଥାକୁ ‘ହାଇପରହାଇଡ୍ରୋସିସ୍’ (Hyperhidrosis) କୁହାଯାଏ।
କାହିଁକି ହୁଏ ଏହି ସମସ୍ୟା? ଡାକ୍ତରଙ୍କ ଅନୁଯାୟୀ, ଗରମ ନଥାଇ ଝାଳ ବାହାରିବା ପଛରେ ଅନେକ ଗୁରୁତ୍ୱପୂର୍ଣ୍ଣ କାରଣ ଥାଇପାରେ:
- ଥାଇରଏଡ୍ ସମସ୍ୟା: ଶରୀରରେ ଥାଇରଏଡ୍ ହରମୋନ୍ ଅଧିକ ମାତ୍ରାରେ କ୍ଷରିତ ହେଲେ ମେଟାବୋଲିଜିମ୍ ବଢିଯାଏ, ଯାହାଫଳରେ ଅଧିକ ଝାଳ ବାହାରେ।
- ଡାଇବେଟିସ୍: ରକ୍ତରେ ଶର୍କରା ବା ସୁଗାର୍ ସ୍ତର ହଠାତ୍ କମିଗଲେ (Hypoglycemia) ଶରୀରରୁ ଥଣ୍ଡା ଝାଳ ବାହାରିବା ଆରମ୍ଭ ହୁଏ।
- ହୃଦରୋଗର ଆଶଙ୍କା: କୌଣସି ଶାରୀରିକ ପରିଶ୍ରମ ନକରି ଯଦି ହଠାତ୍ ଛାତିରେ ଯନ୍ତ୍ରଣା ସହ ଝାଳ ବାହାରେ, ତେବେ ଏହା ହାର୍ଟ ଆଟାକ୍ର ପୂର୍ବ ସୂଚନା ହୋଇପାରେ।
- ମାନସିକ ଚାପ: ଅତ୍ୟଧିକ ଚିନ୍ତା, ଭୟ କିମ୍ବା ଷ୍ଟ୍ରେସ୍ ଯୋଗୁଁ ମଧ୍ୟ ଶରୀରର ସ୍ୱେଦ ଗ୍ରନ୍ଥି ଗୁଡ଼ିକ ଅଧିକ ସକ୍ରିୟ ହୋଇଉଠନ୍ତି।
କେବେ ଯିବେ ଡାକ୍ତରଙ୍କ ପାଖକୁ? ଯଦି ରାତିରେ ଶୋଇବା ସମୟରେ ଅଧିକ ଝାଳ ବାହାରୁଛି, ଓଜନ ହ୍ରାସ ପାଉଛି କିମ୍ବା ଝାଳ ସହ ମୁଣ୍ଡ ବୁଲାଉଛି, ତେବେ ବିଳମ୍ବ ନକରି ବିଶେଷଜ୍ଞଙ୍କ ପରାମର୍ଶ ନିଅନ୍ତୁ। ସଠିକ୍ ସମୟରେ ରକ୍ତ ପରୀକ୍ଷା ଏବଂ ଚିକିତ୍ସା ଦ୍ୱାରା ଏହି ସମସ୍ୟାରୁ ମୁକ୍ତି ମିଳିପାରିବ।
